На основании решения Священного Синода Украинской Православной Церкви от 23 ноября 2022 года, по благословению митрополита Запорожского и Мелитопольского Луки во всех храмах и монастырях Запорожской епархии УПЦ в субботу, предваряющую праздник Покрова Пресвятой Богородицы, будет совершаться заупокойное поминовение усопших (литургии и панихиды) защитников Православия – запорожских козаков.
Служба святого дня Минеи, если не имеет праздничного знака совершается вместе с субботней службой по 13-й главе Типикона. При этом тексты Октоиха заменяются особыми заупокойными текстами козацкой поминальной субботы. Если же с этой субботой совпадет бденный или полиелейный праздник, то память святого на епархиальном уровне переносится на другой день.
НА ВЕЧЕРНИ
Кафизма 18.
На Господи, воззвах поставим стихир 6: святого рядового 3, и сия покойны 3, глас 1:
Днесь чествуем, вернии, козаков, веру Православную до конца сохранивших, и кровию своею землю нашу [Запорожскую] обагривших, память их совершающе, смерти Низложителя Господа прославим, просяще прилежно, в час Страшнаго Суда Его добрый ответ нам дати, и одесную Его стояния нас сподобити.
Честна смерть верных Твоих, Господи, от латинян коварных и безбожников безумных огнем и мечем искушенных и кровь свою за исповедание веры Православныя пролиявших, тии бо упование свое на Тя возложивше, претерпеша поношения гонителей.Сих доблих мужей, жен, отроков и младенцев за Православие убиенных память совершающе, от Тебе, Христе, милости просим и затупления.
Не обладает смерть Православия поборниками,умершими благочестно. Сии бо в надежди воскресения Христу предаша души своя, мучителей безбожных не убоявшеся. Темже молимся прилежно: рабов Твоих, кровию Истину соблюдших, упокой во дворех Твоих, Господи, отцы и братию нашу, христолюбивых козаков Православных, другов и сродников, и всякаго человека, в житии временнем послужившаго верно, и к Тебе преставльшагося, сподоби в Небеснем Царствии водворитися.
Слава, святаго Минеи. И ныне, Богородичен догматик прилучившагося гласа.
Входа нет. «Свете Тихий». Прокимен дне. Таже, Сподоби, Господи:
На стиховне поем стихиры сия, глас 4:
Мученичен: Церкве Божия украшение, страстотерпцев Христовых славу, мучеников Запорожския земли предивных, любовию восхвалим, вернии, почитающе добродетели и страдания их.
Стих: Блажен, яже избрал и приял еси, Господи.
Мертвен: Яко цвет увядает, и яко сень мимо грядет, и разрушается всяк человек: паки же гласящей трубе, мертвии яко в трусе вси восстанут ко Твоему сретению, Христе Боже. Тогда, Владыко, души раб Твоих, иже за Православие не убояшася темницы, горькими работами, гладом и хладом изморенных и многовидными муками умерщвляемых, яко агнцев стада Твоего приими, и во святых Твоих учини селениих.
Стих: Души их во благих водворятся.
Мертвен: Помяни, Господи, о Тебе пострадавших, убиенных в различных походех за Православную веру, и новых страстотерпцев, от родов наших прозябших и муки многоразличныя претерпевших, и приими наша усердныя моления о упокоении сих защитников Православия.
Слава, и ныне, Богородичен, глас 4:
Палата одушевленная Христова, верным же стена, покров, и держава Ты еси, Пречистая. Тобою народ наш, Богомати, спасается; Твоею помощию вернии венчаются; Тобою хвалящеся присно, победы на поганыя носят, покрываемии омофором милости Твоея.
Тропарь, глас 2:
Православия защитников чествующе, иереев в вере твердых, козаков христолюбивых, мужей, жен, отроков и младенцев, за Церковь пострадавших, Владыце Жизни молимся прилежно, во Царствии Небеснем сим водворитися.
Слава: Помяни, Господи, яко Благ, рабы Твоя, и елика в житии согрешиша, прости: никтоже бо безгрешен, токмо Ты, могий и преставленным дати покой.
И ныне: Мати Святая неизреченнаго Света, ангельскими Тя песньми почитающе, благочестно величаем.
НА УТРЕНИ
Вместо Бог Господь: – Аллилуия, глас 2, с заупокойными стихами.
Тропарь, глас 2: «Православия защитников чествующе …» (дважды). «Слава» – ин тропарь, глас тот же: «Помяни, Господи, яко Благ …», «И ныне» – Богородичен, глас тот же: «Мати Святая…».
16 кафизма. Обычная малая ектения.
Седален, глас 4:
Просветивый святыя Твоя паче злата, и прославивый преподобныя Твоя яко благ, от нихже умолен бывая, Христе Боже, жизнь нашу умири, яко Человеколюбец, и молитву приими, яко кадило, Един во святых почиваяй.
Стих: Дивен Бог во святых своих, Бог Израилев.
Страстотерпцы Господни, блаженна земля наша [Запорожская] напившаяся кровьми вашими, на судище бо врага обличисте, и Христа со дерзновением проповедасте. Того яко Блага молите, молимся, спасти души наша.
Стих: Блажени, яже избрал и приял еси, Господи.
Помяни Господи, яко благ, души раб Твоих, и елика в житии согрешиша, прости, никтоже бо безгрешен, токмо Ты могий и преставленным дати покой.
Слава, и ныне. Глас 6:
Богородичен: Безпомощным крепость Ты воистинну, Пречистая Богомати, отсюду, смиреннии, Тобою возвышаемся, о Тебе высоце держимся: всем Ты еси покров и к Богу Ходатаица.
И Непорочны на две статии.
По первой статии бывает малая ектения о усопших. На ектении прошение глаголи сице:
Еще молимся о упокоении душ усопших рабов Божиих, почивших козаков, мужей, жен, невинных чад и всех, за веру Православную даже до смерти пострадавших:
По второй статии тропари мертвеннии по Непорочнах, во глас 5.
И малая ектения о усопших с тем же прошением.
И седален, глас 5:
Покой, Спасе наш, с праведными рабы Твоя, и сия всели во дворы Твоя, якоже есть писано: презирая, яко Благ, прегрешения их, вольная и невольная, и вся, яже в ведении и не в ведении, Человеколюбче.
Слава и ныне, Богородичен:
От Девы возсиявый мiру, Христе Боже, сыны света Тою показавый, помилуй нас.
Псалом 50.
Каноны:
В храме Господском и Богородицы: храма со ирмосом на 6 (ирмосы по дважды), святого дня на 4 и заупокойный Покровской субботы на 4.
В храме святого: канон святого дня со ирмосом на 6 (ирмосы по дважды), храма на 4 и заупокойный Покровской субботы на 4.
Катавасия: ирмосы канона покойного.
Канон заупокойный Покровския субботы. Глас 6. Егоже краегранесие: «Господи, упокой почивших в правоверии».
Песнь 1
Ирмос: Яко по суху пешешествовав Израиль, по бездне стопами, гонителя фараона видя потопляема, Богу победную песнь поим, вопияше.
Господи, невечернему свету Твоему и сладости истинней, яже преставил еси верныя за Православие в земли нашей [Запорожстей] пострадавших, покажи причастники, Благоутробне, и святых соборам сих сопричти.
Облекл еси в нетление в надежде воскресения преставльшихся, и к безконечному и блаженному житию возвел еси, идеже, яко Милостив, поборники веры Православныя и исповедники, ихже приял еси, Спасе, упокой и святых соборам сих сопричти.
Страдания и раны христиан почтим, уничижения, биения, изгнания за исповедание веры претерпевших, имиже Православие в земли нашей [Запорожстей] утвердися. Сих же преставльшихся, Спасе, упокой и святых соборам сопричти.
Богородичен: Поют Тя, Богородице, Ангельстии чини, и славят патриарси со святители пред лицем Твоим текуще в церковь. С нимиже Тя тогда святый Андрей виде, за ны, грешныя, к Богу молящуюся, помиловати люди, славящия Твоего Покрова праздник.
Песнь 3
Ирмос: Несть свят, якоже Ты, Господи Боже мой, вознесый рог верных Твоих Блаже, и утвердивый нас на камени исповедания Твоего.
Оставления грехов даруй, Избавителю Христе, Ты бо Един явился еси на земли Безгрешен, за исповедание веры Православныя пострадавшим, и сия рабы Твоя в сладости райстей всели.
Державу смерти низложив, жизнь нескончаемую всем верным источил еси, Владыко. В той убо учини за исповедание веры Православныя пострадавших, презирая прегрешения, и прощая грехи их, Человеколюбче, и сия рабы Твоя в сладости райстей всели.
Ихже преставил еси повелением Твоим, Владыко Господи, сподоби Царствия Небеснаго, и сия рабы Твоя в сладости райстей всели.
Богородичен: Удивляхуся ангельстии чины, како паче солнечных луч Твоим блистающим омофором освещаеши Церковь и люди, и тьму грехов наших отгониши посещением Твоим, Богородице, к Сыну Твоему и Богу за ны молящися.
По 3-й песни кондак, икос и седален святого дня с Богородичном его.
Песнь 4
Ирмос: Христос моя сила, Бог и Господь, честная Церковь Боголепно поет взывающи, от смысла чиста о Господе празднующи.
Послуживших Тебе, Слове, в Православней вере козаков, в различных походех убиенных, невинных старцев, мужей, жен и чад, ихже привел еси от временнаго жития, спасаемых множеству сочетав, вечныя сподоби жизни.
Озаритися Твоея красоты сиянием в вере Православней усопшим благоволи, Христе Боже, с мученики Твоими, Богатый в милости Сый, вечныя сих верных сподоби жизни.
Крепчайший на смерть был еси, Христе; темже ту связав, нас избавил еси. И ныне избави от сея тления в вере Православней усопших исповедников множество, во вся лета пострадавших за Церковь Твою в земли нашей [Запорожстей], и вечныя сподоби сих жизни.
Богородичен: О, Госпоже, Тебе припадаем верою и, покланяющеся, благодарно вопием Ти: радуйся, Богоблагодатная Дево, Покрове и Ограждение наше, и Помощнице в беде сущим, спаси нас, к Тебе прибегающих, на Тя бо надеемся, вечныя сподоби ны жизни.
Песнь 5
Ирмос: Божиим светом Твоим Блаже, утренюющих Ти душы любовию озари, молюся, Тя ведети, Слове Божий, Истиннаго Бога, от мрака греховнаго взывающа.
Истекшею от ребр Твоих Кровию мир искупил еси; в вере убо усопших, Христе, избави Божественными страстьми Твоими: Ты бо цену за всех Себе дал еси.
Предстоятели, Спасе, десныя верою оправдав, молитвами мученик и исповедник в земли нашей [Запорожстей] возсиявших, яже преставил еси верныя, покажи. Ты бо цену, Христе, за всех Себе дал еси.
Одеждами нетления души раб Твоих, Христе, украси, за веру Православную жизни земныя не пощадивших и землю нашу [Запорожскую] кровию своею обагривших. Ты бо, Владыко Жизни, цену за всех Себе дал еси.
Богородичен: Честнии святых собори, духовными паряще крилы, тайно приидоша Тебе послужити, Богородице, видяще Тя на легце облаце славы, ко Спасу Христу молящуюся подати победу воинству нашему, погубити воюющих нас.
Песнь 6.
Ирмос: Житейское море воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве.
Избранных ликом сопричтав, Благоутробне Господи, преставленныя от нас верныя рабы Твоя упокой, вся тех согрешения презирая за милосердие, и веры Православныя даже до смерти исповедание.
В местех прохлаждения, в местех святых светлости, в местех ослабления, Христе, яко Человеколюбец, ихже приял еси, учини рабы Твоя, вся тех согрешения презирая за веры Православныя даже до смерти исповедание.
Шуияго стояния избави Мелхиседека архимандрита и всех внявших гласу его, на защиту Истины от волков лютых, расхищающих стадо Христово, потщавшихся, и тем согрешений подаждь прощение за веры Православныя даже до смерти исповедание.
Богородичен: Иезекииль виде Господа в подобии человека, носима Херувимы. С нимиже за ны, Огнвидный Престоле Господень, Богородице, молися, да спасет души наша.
По 6-й песни малая заупокойная ектения.
Кондак, глас 8:
Со святыми упокой, Христе, душы раб Твоих, идеже несть болезнь, ни печаль, ни воздыхание, но жизнь безконечная.
Икос: Сам Един еси безсмертный, сотворивый и создавый человека: земнии убо от земли создахомся, и в землю туюжде пойдем, якоже повелел еси, создавый мя и рекий ми: яко земля еси и в землю отыдеши, аможе вси человецы пойдем, надгробное рыдание творяще песнь: Аллилуиа.
Песнь 7.
Ирмос: Росодательну убо пещь содела Ангел преподобным отроком, халдеи же опаляющее веление Божие, мучителя увеща вопити: благословен еси Боже отец наших.
Христе, Победителю смерти, сосуды соделай достойны Православия поборники, земли нашея [Запорожския] достойныя сыны и дщери, к Тебе, Господи, преставльшиися, и пети сих присно сподоби: препетый отец наших Боже, благословен еси.
Верным всем согрешений рукописание раздери, Христе Боже, в раи дерзновенный Адамов грех на Кресте Пригвождей/, емуже ныне рачителей Православия души, яже преставил еси к Тебе, причаститися сподоби, да веселием поют: препетый отец наших Боже, благословен еси.
Причтый к первородным и праведным Твоим, Спасе, души раб Твоих, в земли нашей [Запорожстей] живших и до последняго издыхания своего Православие исповедавших, сподоби сих непрестанно Тебе наслаждатися, поюще: препетый отец наших Боже, благословен еси.
Богородичен: Радости премирныя Источниче, Творче, Спасе наш, Христе Боже, приими молитву Твоея Матере, Юже Тебе за ны, грешныя, приносит, да Тебе радующеся поем: препетый отец наших Боже, благословен еси.
Песнь 8.
Ирмос: Из пламене преподобным росу источил еси, и праведнаго жертву водою попалил еси: вся бо твориши Христе, токмо еже хотети, Тя превозносим во вся веки.
Апостольския веры Православныя защитникам дерзновенным, имиже земля наша [Запорожская] обогатися, верою преставльшимся подаеши светлость Божественнаго Царствия, вопиющим: благословите, вся дела Господня, Господа, и превозносите Его во вся веки.
Всех, Христе, верою усопших, молит Тя сонм святых земли нашея [Запорожския], яко Милосерд, к ликом причти спасаемых, непрестанно вопиющих: благословите, вся дела Господня, Господа, и превозносите Его во вся веки.
Троичен: О, воистинну Приснотекущий Источниче Благости, в Небесных селениях скончавшихся рабов Твоих и житие тленное оставльших всели во дворы вечныя радости, и сподоби пети непрестанно: благословите, вся дела Господня, Господа, и превозносите Его во вся веки.
Богородичен: Восписати недоумею по достоянию Твоего Покрова, Богородице, похвалы, многими бо отягчихся грехи, но яко Мати Божия украси Твой праздник чудесы, да вси, радующеся, поем Господа и превозносим Его во вся веки.
Поем Честнейшую.
Песнь 9.
Ирмос: Бога человеком не возможно видети, на Негоже не смеют чини ангельстии взирати: Тобою же Всечистая, явися человеком Слово воплощенно, Егоже величающе, с небесными вои Тя ублажаем.
Егоже причащаются святых собори веселия присносущнаго, сподоби, Блаже, причастники быти вся, верою в земли нашей [Запорожстей] благочестно поживших и во уповании жизни вечныя к Тебе преставльшихся; во светлости святых всели их, Господи, даруя им блаженное упокоение.
Ратники Православныя, ихже козаками именуют, помилуй, Христе Боже, аще сии и согрешиша, но за веру Православную жизни своея не щадиша и со упованием неложным грехов оставления чают. Сим, Милосердия Твоего бездну отверзающе, светлости святых сподоби их, Господи.
Избави огня вечнаго, Владыко Христе, от нас преставльшихся: сих греховное рукописание растерзав, яко Един Человеколюбец, и святых светлости сподоби их, Господи.
Богородичен: Исцеляти недуги христиан и от бед избавляти, и грехи отпущати, и от пленения спасати, и всякия нужды утоляти дар от Бога прияла еси яко Мати Божия. И нас не презри, Госпоже: веси бо, ихже требуем, здравия телесем и душам спасения.
Катавасия и Достойно есть.
Ексапостиларий Октоиха.
На хвалитех стихиры покойны, глас 4:
Жизнодавче Господи, молитвами новомучеников и исповедников [Запорожских] упокой со всеми праведными верныя рабы Твоя, за имя Твое пострадавших: святители и иереи, монахи и мирския, старыя, юныя и всяк возраст, именуемыя и неименуемыя, яко истинныя чада и други Божия.
Во бранех с восстающими на Церковь страдальцы козаки и новомученицы досточуднии Господу последовавша, муки за имя Его претерпеша и верно отцем, мужем и братиям нашим, Христа ради мучимым, послужиша. Сего ради ныне в жизни вечней вкупе первии с последними трапезы безсмертныя, молимся, да наслаждаются.
Ликуйте, кровию Истину соблюдшии, дерзайте за Церковь пострадавшии: умертвися смерть, пленен бысть и ад с нею, и Христос воцарися, распныйся и воскресый. Той дарова нам нетление плоти, Той воздвизает нас, и дарует воскресение, и славы оныя с веселием вся сподобляет, в вере Православной непреклонно веровавших в Него.
Слава, мертвен, глас тойже: Во стране праведных Твоих учини, Милостиве, верою к Тебе преставленныя защитники Православия от врагов коварных, Человеколюбче.
И ныне, Богородичен, глас тойже: Хваление Тебе, еже по достоянию, людие, Пречистая Владычице, желающе воспети, не возмогут. Всегда бо всех верных заступаеши и покрываеши честным Твоим Покровом, и молишися спастися всем, верою Тебе Чистую и Истинную Богородицу почитающим.
На стиховне стихиры покойны, глас 6:
Запорожския Сечи украшение, рачителей веры и Православия исповедников дерзновенных в живущих стране учини, Господи, идеже потоцы сладости проливаются, идеже источницы присноживотнии истекают.
Стих: Души их во благих водворятся.
Живыми и мертвыми обладаяй, к Тебе Единому Благодателю отшедших козаков Православных, мужей и жен и чад невинных, [Запорожскую] нашу землю кровьми своими обагривших, во святых светлостех со избранными Твоими, Спасе, в селениях праведных и во стране живущих, Человеколюбче, упокой.
Стих: Блажени яже избрал, и приял еси Господи.
Господне достояние, Поднепровья прозябение, верныя Церкви Православныя, твердо отвергли есте нечестивое духа растление, Жизни нетленней последующе, яже есть Христос, Просвещение душ наших.
Слава, глас тойже: Несть человека, иже жив будет и не согрешит, Христе Спасе наш, но вемы человеколюбие Твое. Темже молим Тя прилежно, светлейшаго Света и веселия вечнаго, яви причастники вечныя жизни, ихже преставил еси от привременных, исповеданием Православия землю нашу украсивших, презирая прегрешения их вольная же и невольная.
И ныне, Богородичен, глас 6:
Молитвами Рождшия Тя, Христе, святителей, исповедников и новомучеников, преподобных, и праведных и всех святых, усопших раб Твоих упокой.
Вседневное славословие.
По Трисвятом – тропарь, глас 2: Православия защитников чествующе: Слава, ин тропарь, глас тойже: Помяни, Господи, яко Благ: И ныне, Богородичен, глас тойже: Мати Святая:
НА ЧАСАХ
Тропари: Православия защитников чествующе: Слава, Помяни, Господи, яко Благ:
Кондак: Со святыми упокой:
НА ЛИТУРГИИ
Блаженны от 3-й и 6-й песни заупокойного канона, на 6.
По входе: тропарь, глас 2: Православия защитников чествующе: Ин тропарь, глас тот же: Помяни, Господи, яко Благ: Слава, кондак, глас 8: Со святыми упокой: И ныне, Богородичен, глас тойже: Тебе и Стену, и Пристанище:
Прокимен дня, глас 8: Веселитеся о Господе: и заупокойный, глас 6: Души их во благих:
Апостол дня и заупокойный, 1 Сол., зач. 270.
Аллилуиарий дня: Воззваша праведнии: и заупокойный: Блажени, яже избрал:
Евангелие дня и заупокойное, Ин., зач. 16.
Причастен дня: Радуйтеся, праведнии: и заупокойный: Блажени, яже избрал:
